Tuesday 4 May 2021

పతనం అవుతున్న కుటుంబ బాంధవ్యాలకు పరాకాష్ట ‘’ జోజి’’ సినిమా



 పతనం అవుతున్న కుటుంబ బాంధవ్యాలకు పరాకాష్ట ‘’ జోజి’’  సినిమా

 

అమెజాన్ ప్రైమ్ లో వకీల్ సాబ్ చూసి చాలా ఆనందంగా ఉన్నారా? ఒకవేళ మీకు అమెజాన్ ప్రైమ్   మీ స్మార్ట్ టీవి లో ఉంటె ఒక మంచి మళయాళ సినిమా చూడండి...   మహేషింటే ప్రతీకారం ( ఉమామహేశ్వర ఉగ్రరూపస్య తెలుగు రీ మేక్), బెంగళూర్ డేస్, తొండి మాథులం ద్రిక్సక్సీయం, అయోబింటే పుస్తకీయం,  కుమ్బలంగి నైట్స్, సి యు సూన్, ఎంజన్ ప్రకాశన్, 22 ఫిమేల్ కొట్టాయం  మొదలగు  అద్భుతమైన సినిమాలతో  కేవలం కేరళలోనే కాక దేశమంతటా మంచి నటుడిగా తండ్రికి తగ్గ నిజమైన సినీ వారసుడిగా పేరుగాంచిన ఫాహాద్ ఫాజిల్  గురించి తెలియని సినీ ప్రేక్షకులు ఉండరు.

కరోనా సమయంలో కూడా తక్కువ కాలంలో మంచి సినిమాటిక్ విలువలతో ఆలోచించతగ్గ కథనం అమెజాన్ ప్రైం లో మనకు ఫాహాద్ ఫాజిల్ నటించిన జోజి అనే సినిమా విమర్శకుల ప్రశంసలు పొందుతుంది.  షేక్ స్పియర్ రాసిన మెక్ బెత్  ఈ సినిమాకి మాతృక అని కొందరు అభిప్రాయపడిన వాస్తవానికి ఈ సినిమా  మెక్ బెత్  కథనానికి చాలా దూరంగా ఉంటుంది.

మారుతున్న కుటుంబ పరిస్థితులు, కుటుంబంలోని సంబంధ బాంధవ్యాలు. పిల్లలను ప్రయోజకులుగా ఎన్ని ఏళ్ళు వచ్చినా  స్వతంత్రత ఇవ్వకుండా  తనమీద ఆధారపడే వారిగా పెంచితే,  ఏదో ఒక కారణంగా వారు వెనుకబడినా, వైఫల్యం చెందినా వారికి చేయూత ఇచ్చి, అర్థం చేసుకొని జీవితంలో స్థిర పడేందుకు సహాయపడకుండా  వారిని ఎగతాళి చేస్తూ, పనికిరాని వారిగా ముద్ర వేసి  అవమానపరిస్తే  అది చివరికి ఆ కుటుంబం ఎలా ఇబ్బందులు పడుతుందో ఈ సినిమాలో చక్కటి కథనం తో చూపించాడు దర్శకుడు దిలీష్ పోతాన్.

క్లుప్తంగా కథ ఏమిటంటే:   పితృస్వామిక, ఉమ్మడి కుటుంబ వ్యవస్థకు ప్రతీకగా కేరళలో కొట్టయ్యన్ ప్రాంతంలో అత్యంత ధనికుడైన  రబ్బరు తోటల యజమాని కుట్టప్పన్ అతని ముగ్గురు కొడుకులు, ఒక కోడలు, ఒక మనవడు ఈ సినిమాలో ప్రధానంగా కనబడే పాత్రలు.  వయస్సు  మీద పడినప్పటికీ,   ఆర్ధిక వ్యవహారాలన్నీ తానే చూసుకుంటూ, పిల్లలను  స్వతంత్రులుగా కాకుండా తన మీద ఆధారపడే వారు గా చూస్తుంటాడు. పెద్ద కొడుకు జోమన్  త్రాగుడు కు అలవాటు పడి, భార్య నుండి విడి పోయి ఉంటాడు. రెండవ కొడుకు జైసన్, అతని భార్య బిన్సీ  స్వంత ఆలోచనలు అమలు చేయడానికి ప్రయత్నించిన  తండ్రి నుండి ఆర్ధిక సహాయం లేక అసంతృప్తితో ఉంటారు.

 ఈ సినిమాకి ప్రధాన పాత్ర మూడవ కొడుకైన జోజి  ( ఫాహాద్ ఫాజిల్)  చదువు కొనసాగించలేక ఇంట్లో తండ్రి చేత పనికిమాలినవాడిగా ముద్ర వేయబడి, చిన్న చిన్న విషయాలకి తండ్రి ఆర్ధిక సహాయం చేయకపోవడం వలన తీవ్ర మానసిక వ్యథ తో, ఉద్వేగభరితంగా ఉంటాడు.  మనవడైన (రెండవ కొడుకు కుమారుడు) పాపీ   లాక్ డౌన్ కారణంగా ఆన్ లైన్ క్లాసులు వింటూ తాతకి తెలియకుండానే అతను స్నానానికి వెళ్ళినప్పుడు  అతని మొబైల్ ద్వారా ఆన్ లైన్ లో పెల్లేట్ గన్ ఆన్ లైన్ ద్వారా కొంటాడు.  ఈ గన్ కూడా చివరిలో కీలక పాత్ర వహిస్తుంది.

కుటుంబ యజమానియైన కుట్టప్పన్ వయసు మీద పడినా రోజువారీ వ్యాయామం చేస్తూ, అన్ని పనులు తానే చేయగలననే ధీమా తో ఉండి, వ్యవసాయ బావిలో మోటార్ మరమ్మత్తు చేస్తున్నప్పడు తన మితిమీరిన స్వభావం వలన గుండె పోటు తెచ్చుకొని ఆసుపత్రి పాలవుతాడు. తండ్రి జబ్బు పడ్డాడు అనేదానికన్నా ఆర్ధిక స్వేచ్చ వస్తుందనే ఆనందంలో ఉంటారు పిల్లలు. వీలునామా రాసాడా అని ఆరాలు తీస్తుంటారు. 

ఆసుపత్రి నుండి ఇంటికి వచ్చినా మంచం మీదే ఉంటాడు.  తండ్రి చావు కోసం ఎదురుచూస్తున్న కొడుకులు తమలో తామే అసంతృప్తితో ఉంటారు. తండ్రి చేత అవమానాలకు గురైన మూడవ కొడుకు జోజి తండ్రి చావుకు పథకం వేస్తాడు. ఈ విషయం కనిపెట్టిన రెండవ అన్న భార్య వదిన  బిన్సీ అడ్డు చెప్పదు. ఈ కుట్ర బయటపడి పోతుందనే భయంలో పెద్ద అన్నని పెల్లేట్ గన్ తో హతమార్చి, ఆ నిందని పనివాడి మీద వేస్తాడు. తనపై అనుమానపడుతున్న రెండవ అన్నని ప్రలోభ పెడతాడు. చివరికి  తన కుట్ర బయటపడి పోలీసులు ఇంటికిరావడంతో  ఈ సమాజమే తన పతనానికి కారణం అంటూ తన జీవితాన్ని ముగుస్తాడు జోజి.

కథ ని ఎంత క్లుప్తంగా చెప్పినా  ఇందులో ఫాహాద్ ఫజల్  నటన, దర్శకుడు దిలీస్ పోతన్  ప్రతిభ, కథా రచయిత శ్యాం పుష్కరన్ కథనం సినిమాకి ప్రాణం పోశాయి. కాకపొతే సినిమా కొంచెం నిదానంగా నడుస్తుంది. మంచి సినిమా చూసామనే సంతృప్తి తప్పక కలిగిస్తుంది. 

                                                        ...అలజంగి ఉదయకుమార్

Sunday 3 January 2021

ఖలీల్ జిబ్రాన్ కవితలు - తెలుగు అనువాదం

 సంపూర్తిగా జీవించు...


అర్థ ప్రేమికులపై అనురాగం చూపకు
 అర్ధ సావాసగాళ్లతో  స్నేహం చేయకు
అర్థ నైపుణ్యగాళ్లతో వ్యవహారం పూనకు
అర్ధ జీవితం గడపకు 
అలానే
అర్ధ మరణనాన్ని ఆస్వాదించకు
నిశ్సబ్దాన్ని కోరుకున్న యెడల
మారు మాటైనా పలకకు
 మాట్లాడటం మొదలుపెడితే చెప్పాల్సిందే చెప్పేవరకు ఆపకు
మౌనం లో భాషను గాని, సంభాషణలో మౌనాన్ని గాని శ్రుతి చేయకు,
 అంగీకరిస్తే మొండిగా వ్యక్తపరచు,
 ముసుగులో దాచకు,
తిరస్కరిస్తే స్పష్టంగా తెలియచేయ్
 ఎందుకంటే అస్పష్టంగా తిరస్కారం బలహీనమైన అంగీకారం అవుతుంది.
అర్ధ పరిష్కారాన్ని అంగీకరించకు, 
అర్థ సత్యాలను ఔననకు
అర్హస్వప్నాలను వీక్షించకు
అసంపూర్ణ ఆశలలో వీరవిహారం చేయకు
అర్ధ పానీయం నీ దప్పికను తీర్చదు
సగం భోజనం నీ ఆకలిను సంతృప్తి పరచదు
సగం ప్రయాణం నీ మజిలీని చేర్చదు
అర్ధ ఆలోచన ఏ ఫలితాన్ని ఇవ్వదు
ఆ మిగిలిన సగం నీవు ప్రేమించేది కాదు
ఆ సమయంలోనే నీలో మిగిలిన ఆ సగం మరో సమయంలో గడపాల్సినదే
నీవు గడపని ఆ సగం నీవు గడపకుండా విడిచిపెట్టినదే
నీవు పలకని ఆ మాట గాని,
వాయిదావేసిన చిరునవ్వు గాని,
నీవు పొందని ఆ ప్రణయం గాని,
నీకు తెలియని ఆ స్నేహం గాని,
నీవు చేరుకోని ఆ గమ్యం గాని,
నీవు పూర్తి చేయని ఆ పని గాని,
గైర్హాజరుగా హాజరైన చోటు గాని
నీ సన్నిహితులకే నిన్ను ఒక పరాయివాడిని చేస్తుంది 
వారిని నీకు కానివారిగా చేస్తుంది
అసంపూర్తిగా మిగిలిన 
ఆ రెండో సగం నీ అసమర్థత కావచ్చు కానీ 
నీకు నీవు సమర్థుడవే కదా
అసంపూర్ణుడవు కాదు కదా
సంపూర్ణ జీవితాన్ని  పూర్తిగా జీవిచడానికే జీవించవలసినవాడివే కదా
సగం జీవితాన్ని కాదు కదా....
....... ఖలీల్ జిబ్రాన్

భయం - ఖలీల్ జిబ్రాన్

 సాగరం లో సంగమించే 

సమయంలో ,

భయం నిలువెల్లా 
ఆవహించగా ఒక నది
గజ గజ లాడిందట...

ఒక్క మారు వెనక్కి తిరిగి
పర్వత శిఖరాలలో  మొదలై,, సుదీర్ఘమైన
మలువులతో కూడి, అరణ్యాలను, గ్రామాలను
దాటుకుంటూ
తాను ప్రయాణించిన మార్గాన్ని,
వీక్షించిందట...

తన ముందట విశాలమైన
సముద్రాన్ని చూస్తుంది.
సముద్రంలో కలవడం అంటే
తన ఉనికిని
శాశ్వతంగా కోల్పోవడమే...
కానీ వేరు దారి లేదు
వెనుకకు మరలిపోలేదు

నదే కాదు ఎవరైనా సరే
ఉన్న స్థితి నుండి
వెనక్కిపోవడం అసంభవం,అసాధ్యం

నది ముందుకు సాగి
సాగరంలో కలిసే సాహసం చేయాల్సిందే,
ఎందుకంటే అలా అయితేనే,
తన భయం మాయమవుతుంది.
అంతేకాదు సముద్రంలో కలవడం ద్వారా,
తన ఉనికిని కోల్పోవడం కాదు
తానే సముద్రం గా మారుతున్నానని సత్యాన్ని 
ఆ నది తెలుసుకోగలుగుతుంది.
Khalil Gibran

Sunday 8 July 2018

బహుముఖ ప్రజ్ఞలు -- పిల్లల ప్రతిభను గుర్తించి పదునుపెట్టడం ఎలా ?


బహుముఖ ప్రజ్ఞలు -  హార్వర్డ్ విశ్వ విద్యాలయానికి చెందిన హావర్డ్ గార్డ్నర్  ప్రతి పిల్లవారిలో ఎనిమిది రకాల బహుముఖ ప్రజ్ఞలు పుట్టుకతో అతి సహజంగా ఉంటాయని  ఫ్రేమ్స్ ఆఫ్ మైండ్  అనే తన పరిశోధనాత్మక గ్రంధంలో వివరించాడు. వాటిని ఆటలతో పాటలతో, చిన్న  చిన్న ఆచరణ సాధ్యమైన కృత్యాలతో తల్లిదండ్రులు సాన పెట్టి  వారిని నిష్ణాతులు చేయాలని పేర్కొన్నాడు. పాటశాల అన్ని ప్రజ్ఞాసామర్ధ్యాలను అభివృద్ధి చేసేందుకు అవకాశం ఉండదు కాబట్టి. ఈ వేసవి సెలవలను వాటిని అభివృద్ధి చేయవచ్చునో నిపుణులు తెలియచేస్తున్నారు.
పిల్లలలో సహజంగా ఉండే ప్రజ్ఞా సామర్ధ్యాలు – అవి అభివృద్ధి చేసే చిన్న చిన్న కృత్యాలు:
1.     LINGUISTIC INTELLIGENCE : భాషా సామర్ధ్యాలు : ఈ వేసవి కాలంలో పిల్లలకు బాల సాహిత్యం, కథల పుస్తకాలు, దిన పత్రికలు చదవడం అలవాటు చేయండి.  క్విజ్ పుస్తకాలు కొని ఇచ్చి వాటి పై ఉన్న ప్రశ్నలు అప్పుడప్పుడూ అడగుతూ ఉండండి.
విహార యాత్రలకు తీసుకువెళ్తే వారి అనుభూతులను ఒక డైరీలో రాయమనండి.
పెద బాలశిక్ష. నీటి శతకాలు లోని కొన్ని పద్యాలను చదివి వాటి భావాలను రాయమనండి.
2.    MATHAMATICAL INTELLIGENCE: గణిత లేదా తార్కిక సామర్ధ్యం:  పజిల్స్  సాధించడం, వారితో కూర్చొని చదరంగం ఆడటం, సుడోకు, రూబెక్స్ క్యూబ్, అబాకస్ మొదలగునవి నేర్పించడానికి వేసవి సెలవలను మించిన అవకాశం ఉండదు. అయితే వీటిని వారు ఆనందించే విధంగా నేర్పించాలి. ప్రోత్సహించాలి.
3.    MUSICAL INTELLIGENCE: సంగీత సంబంధ సామర్ధ్యం:  పిల్లల ఆసక్తి బట్టి శాస్త్రీయ సంగీతం కాని ఫ్లూట్, తబలా, గిటార్ వంటి వాయిద్యాలను నేర్చుకోవడానికి అవకాశం ఉంటే వారిని ప్రోత్సహించండి. సినిమా పాటలు గాని, జానపద గీతాలు గాని పాడుతుంటే వారితో పాటు మీరు ఆనందించండి. వారు పాడిన పాటలను వీడియో రికార్డింగ్ చేసి యూ ట్యూబ్ లో మీ బంధువులు, స్నేహితులతో పంచుకోండి.
4.    VISUAL/SPATIAL INTELLIGENCE దృశ్య మరియు ప్రాదేశిక సామర్ధ్యం:  పిల్లలకు అట్లాస్. మేప్ లు కొని ఇచ్చి వివిధ ప్రదేశాలను గుర్తించమని చెప్పండి.  వారికి చిత్ర లేఖనం, క్లే మౌల్దింగ్ , గ్రాఫిక్ డిజైనింగ్ ఈ అంశాలలో శిక్షణ ఇవ్వం కాని లేదా వారు నేర్చుకోడానికి అవకాశం కల్పించండి. సైకిల్ , స్కూటీ వంటివి తొక్కడం మీ స్వీయ పర్యవేక్షణలో నేర్పించండి. పిల్లలు కళ్ళకు గంతలు కట్టి దాగుడుమూతలు ఆడుతారు. వాటివలన ఈ సామర్ధ్యం బాగా పెరగడానికి అవకాశం ఉంటుందని గ్రహించండి.  విశాఖ సముద్ర తీరం. కైలాసగిరి, అరకు మొదలగు ప్రాంతాలకు తీసుకువెళ్ళి వారితో పాటు మీరు ఆనందించండి.
5.    PHYSICAL INTELLIGENCE: శారీరక సామర్ధ్యం;  శరీరం, మనసు మధ్య సమతౌల్యం సాధించే ఈ సామర్ధ్యం పిల్లలు చలాకీగా , హుషారుగా ఉండటానికి దోహదపడుతుంది. వారికి నచ్చిన వచ్చిన ఆటలను ఆడుకోనివ్వండి. యోగా, కరాటే, క్రికెట్ మొదలగు వాటిని నేర్చుకోడానికి అనేక వేసవి శిబిరాలు  క్రీడా సాదికారతా సంస్థ ప్రభుత్వ సహకారంతో నిర్వహిస్తే అందులో చేర్పించండి.
6.    INTERPERSONAL INTELLIGENCE సాంఘిక సంబంధాల సామర్ధ్యం:  బిజీ బిజీ బ్రతుకులతో ఎవరు ఎవరికీ ఏమవుతారో తెలియకుండా పిల్లలు పెరుగుతున్నారు. మీ వంశ వృక్షం వారికి తెలియ చేసి వివిధ బంధువుల సంబంధాలను, వారి పేర్లతో ఒక చార్ట్ తయారు చేయించండి. వీలైనంత మంది బంధువులను కలవడానికి అవకాశం కల్పించండి.  స్నేహితులతో ఆడుకోనీయండి. ఫీల్డ్ ట్రిప్స్, ట్రెక్కింగ్ మొదలగువాటికి వెళ్తామంటే ప్రోత్సహించండి. నలుగురితో ఎలా మెలగాలో వారు తెలుసుకునేందుకు ఈ వేసవి సెలవలను ఉపయోగించండి.
7.    INTRA-PERSONAL INTELLIGENCE: స్వీయ విశ్లేషణా సామర్ధ్యం;   ఈ వేసవి సెలవలను పిల్లలి తమను తాము తెలుసుకునేందుకు, చిన్న చిన్న సమస్యలకు క్రుంగి పోకుండా రాటుదేలేందుకు, మానసికంగా ధృఢ తరం అయ్యేందుకు ఈ వేసవి సెలవుల్ని ఉపయోగించండి. వారికి డైరీ రాయడం, వివిధ వ్యక్తుల ఆత్మ కథలను చదవడం అలవాటు చేయండి. వివిధ మానసిక ఉద్వేగాలు కలిగేతపుడు ఎలా ప్రవర్తించాలో ప్రేమతో వివరించండి. వారి వ్యక్తిత్వం లోని లోపాలను వారు బాధపడకుండా వారికి ఎలా ఉండాలో, ఎలా ఉండకూడదో తెలియచేయండి. యూ ట్యూబ్ లో ఉండే వివిధ ప్రసంగాలను చూసే అవకాశం కల్పించి ఉత్తమ వ్యక్తిత్వం పొందేందుకు సహకరించండి. ఈనాడు వారు నిర్వహించే వ్యకిత్వ వికాస శిబిరాలకు పంపించండి.
8.    NATURAL INTELLIGENCE ప్రకృతి పరిశీలనా సామర్ధ్యం : పర్యావరణ స్పృహ, అవగాహన కలిగేందుకు అవకాశాలు కల్పించండి. ఇంటి పెరడు లో అవకాశం ఉంటే వివిధ మొక్కలు వారిచే ఈ సెలవుల్లో పెంచండి. పెరడు లేనివారు బాల్కనీ లో  టెర్రస్ పై  కుండీలలో వివిధ మొక్కలు పెంచడం, రోజూ వాటిని పరిశీలన చేయడం అలవాటు చేయండి.  చిన్న చిన్న శారీరక రుగ్మతలకు ఇంట్లో లబించే జీలకర్ర, వాము, శోంటి, అల్లం, తులసి ఎలా ఉపయోగపడతాయో నేర్పించండి.  వీలైనన్ని  ప్రదేశాలను చూసేందుకు అవకాశం కల్పించండి. దగ్గరలో ఉన్న పార్క్ లను, ఉద్యానవనాలను, సింహాచలం, పద్మనాభం, అన్నవరం, దేవీపురం, గుడిలోవ, కంబాలకొండ, తోటల కొండ మొదలగు ప్రదేశాలకు తీసుకువెళ్ళండి.

పిల్లలలో ఉండే ఏ రెండు సామర్ధ్యాలైన సరిగా పెంపొందిస్తే వారు ఏంటో ప్రయోజకులవుతారని గార్డ్నర్ చెబుతారు, స్కూల్ నందు కేవలం భాషా సామర్ధ్యం, గణిత సామర్ధ్యానికి మాత్రమె ఈ రోజుల్లో అధిక ప్రాధాన్యత ఇవ్వబడుతుంది. మరి ఈ వేసవి సెలవుల్ని వినోదంతో పాటు విజ్ఞాన దాయకం ఉపయోగించుకోవలసిన బాధ్యత తల్లిదండ్రులదే. పిల్లలను బహుముఖ ప్రజ్ఞావంతులుగా తీర్చిదిద్ది వారికి ఉత్తమ భవిష్యత్తు కానికగా ఇవ్వండి.
                         విష్ యు ఆల్ ది బెస్ట్
                         అలజంగి ఉదయ కుమార్ 

Thursday 5 January 2017

MANAGEMENT LESSONS FROM THE FILM '' BUSINESSMAN''

MANAGEMENT LESSONS FROM THE FILM                                   

'' BUSINESSMAN''

                    చూసే కళ్ళుంటే, అర్థం చేసుకునే మనసుంటే నేర్చుకునేందుకు అనేక విషయాలుంటాయి. ఈ సినిమా విడుదలై  ఎన్ని సంవత్సరాలు అయినా అది సృష్టించిన సంచలనం మహేష్ బాబు మరియు దర్శకుడు పూరి జగన్నాథ్ కెరీర్ లో చెప్పుకోతగ్గ సినిమాగా నిలచింది .  ఈ  బిజినెస్ మేన్ సినిమాలో మేనేజ్ మెంట్ కు సంబంధించిన వ్యక్తిత్వ వికాస శిక్షణకు సంబంధించిన విషయాలు చర్చిద్దాం..    

                    దర్శకుడు పూరీ జగన్నాధ్ నిత్యం అనేక పుస్తకాలు చదవడమే కాకుండా అనేక ప్రముఖ వ్యక్తిత్వ వికాసానికి సంబంధించిన పుస్తకాలలో ఉన్న విషయాలను కథానాయకుల వ్యక్తిత్వాన్ని మలచడానికి ఉపయోగిస్తుంటారు. బిజినెస్ మేన్ చిత్రం లో అనేక విషయాలు ఒక మంచి వ్యక్తిత్వవికాసానికి సంబంధించిన పుస్తకానికి కావలసిన సబ్జెక్ట్ , సత్తా, పటుత్వం అన్నీ ఉన్నాయి... ఈ మధ్య ఒక పత్రికా సమావేశంలో ఈ సినిమా కథాంశాన్ని ఒక పుస్తకం గా రాస్తానని చెప్పడం చాలా ఆనందించదగ్గ విషయం. ఇవి మీ అందరితో పంచుకుందామనే ఆసక్తి ఈ వ్యాసం రాయడానికి మూల కారణం.  సినిమా తయారీలో ఉన్న భారీ పెట్టుబడి కోసం కొంత మసాలా అన్ని వర్గాల కోసం  జోడించినా  సినిమా కథాంశంలో  యువత ప్రయోజనం కోసం  కొన్ని నియమాలను పాటించడం పూరీ జగన్నాథ్  గారి ఆనవాయితీ...
             
                  ప్రతీ మేనేజ్ మెంట్ నిపుణులు   పీటర్ డ్రక్కర్  మొదలుకొని స్టీఫెన్ కొవె వరకు చెప్పే సూత్రాలు ఈ సినిమాలో చాలా ఉన్నాయి.   మా వ్యక్తిత్వ వికాస  శిక్షకులు నిర్వహించే సెమినార్ లలో  పోకిరీ  సినిమాకి సంబంధించిన రెఫరెన్స్  డైలాగ్  కానీయండి లేదా సన్నివేశం కానీయండీ లేకుండా  మా సెమినార్ లు పూర్తి కావు అంటే అతిశయోక్తి కాదు.   నేటి యువతకు  సినిమా  మాధ్యమంలో  ఈ నియమాలు బాగా తలకెక్కుతాయి. మహేష్  బాబు లాంటి  భారీ  యూత్  ఫాలోయింగ్ హీరో తో చెప్పిస్తే  అనుసరించే వాళ్ళ సంఖ్య కూడా పెరగవచ్చు.  సినిమాలో  మనం గమనించదగ్గ  కొన్ని మేనేజ్ మెంట్ సూత్రాలు  క్రింద తెలియచేయబడ్డాయి.
అవి ఏమిటంటే...
       1. HAVE A CLEAR GOAL - DECLARE IT 
          2. DEVELOP TRUST AMONG THE PEOPLE 
          3. INFORMATION GIVES CONFIDENCE 
4. FORM BUFFER CENTERS & DEVELOP A TEAM AND MAINTAIN      WITH WIN/WIN
5. TAKE CALCULATED RISK - DEVELOP SAFEGUARD MECHANISM 
          6. HAVE COMMUNICATION AND NEGOTIATION SKILLS
          7. HAVE RIGHT PHILOSOPHY OF LIFE
          8. SUCCESS DEPENDS UPON NET WORKING :
          9. READY TO SACRIFICE  FOR YOUR DREAM 
          10. LIFE IS A MESSAGE.  

1. HAVE A CLEAR GOAL - DECLARE IT :

                      ఈ సినిమాలో  చాలా  ఖచ్చితం గా చెప్పిన విషయం ఏమిటంటే  ప్రతీ ఒక్క వ్యక్తికి ఒక లక్ష్యం ఉండాలి.  నీ లక్ష్యం  10  మైళ్ళు అయితే 11   మైలుకి  గురి పెట్టు అని చాలా  స్పష్టం గా చెబుతాడు హీరో.    సినిమా ప్రారంభంలో హీరో తాను ముంబాయికి ఎందుకు వచ్చాడో  చాలా స్పష్టం గా చెబుతాడు. ఏదో నెమ్మదిగా పనిచేసుకోడానికి రాలేదు. మాఫియా మళ్ళీ  పునరజ్జీవింపచేయడమే లక్ష్యం అంటాడు.   కాని అంతిమ లక్ష్యం ఏమిటనేది కథా గమనం లో తెలుస్తుంది.   నీ లక్ష్యం ఎలా ఉండాలంటే  అది వినేవాళ్ళకు  ఆశ్చర్యం కలగాలి. నోరు వెళ్ళబెట్టాలి. అబ్దుల్ కలాం అంటారు low aim is a crime అని.   Crime  కి  సంబంధించిన aim  అయినప్పటికీ  ఇక్కడ లక్ష్యం చిన్నదా పెద్దదా? అనేది ముఖ్యం.  లక్ష్యం తరుచూ ప్రకటించడం వలన దానిని సాధించాలనే కమిట్ మెంట్  పెరుగుతుంది.  లక్ష్యం  అనేది  కాలం తో పాటు  మారుతూ ఉండాలి.   చివరిలో  మహేష్ బాబు హీరోయిన్ తో ఒక వేళ నీ ప్రేమ నిజమై నే బ్రతికితే  ముంబాయి కి  కాదు ఇండియా మొత్తానికి..........  అంటూ   సిగ్నిఫికెంట్ గా  చేయి చూపిస్తాడు. Micro Aims will  be changed into Macro Aims along with the time.

2. DEVELOP TRUST AMONG THE PEOPLE ;

                      లక్ష్యం ఉంటే సరికాదు  దానిని సాధించేందుకు  సరిపడా జట్టు ఏర్పాటు చేసుకోవాలి  తన వారందరిలో తనకు  ఆ సత్తా   ఉందనే విశ్వాసం  కలిగించాలి.   అందుకే తన లక్ష్యాన్ని ప్రకటించినపుడు నోరు వెళ్ళిబెట్టిన బ్రహ్మాజీ ని చాచి కొడతాడు. నీవంటే  భయం కలుగుతుందిరా  అంటే  నీకే భయం కలిగించలేకపోతే ముంబాయికి ఎలా భయం కలిగించ కలుగుతానని అంటాడు.  డోంగిరీ కి వెళ్ళి అక్కడ క్రిమినల్స్  చితక్కొట్టి తాను అందరినీ నడిపించగల నాయకుడినని అందరికీ పని కల్పిస్తానని ఎటువంటి ఈగోలు లేకుండా తన క్రింద పని చెయ్యమని చెప్పి ఒక్కొక్కడికి డబ్బు అడ్వాన్స్ గా ఇచ్చి  వారి విశ్వాసం పొందుతాడు.  మున్షీ  ని   షకీల్ అండ్ టీం తో  జైల్ లో చంపించి లాలూ (  షియాజీ షిండే     )  విశ్వాసం పొందుతాడు. తాను  ప్రారంభించే  బిజినెస్ బ్యాంక్ ప్రారంభోత్సవానికి నాజర్ ని పిలిచి  '' నీ లాంటి కసి ఉన్నవాడు  మా డిపార్ట్ మెంట్ లో ఎందుకు లేడని ''  అతని విశ్వాసం పొందుతాడు.  నాయకుడికి ఉండవలసిన మొదటి లక్షణం  ప్రజల విశ్వాసం, విశ్వసనీయత  పొందగలగడం.  అది కోల్పోయిన వాళ్ళు తిరిగి పొందడానికి ఎన్ని పాట్లు పడుతుంటారో నిజ జీవితంలో చూస్తున్నాం. దారావిలో  బ్యాంకు అప్పులతో బాధపడుతున్న సామాన్య ప్రజానికానికి  పది రోజుల్లో అందరి ఇళ్ళ పట్టాలు ఇప్పిస్తానన్న మాట నిలబెట్టుకోవడం ద్వారా అక్కడ ప్రజల మద్దతు పొందుతాడు.   విశ్వసనీయత, నమ్మకం  జట్టును గాని ప్రజలను గాని నడిపించేందుకు ముఖ్యమైన సాధనాలు

3. INFORMATION GIVES CONFIDENCE :
      
                 హీరో  తన తల్లిదండ్రులను చంపిన ప్రకాష్ రాజ్ పై పగ సాధించడానికి   అమాయకంగా  పధ్నాలుగు సంవత్సరాల వయస్సులో బహిరంగంగా చంపడానికి సిద్ధపడి, విఫలమైన తర్వాత తన లక్ష్యాన్ని సాధించడానికి  సంబంధించిన , దానికి కావలసిన సమచారం సంపాదిస్తాడు.   మున్షీ  వలన లాలూకి గల  ఇబ్బంది తెలుసుకుంటాడు.  తనగురించి  నెగటివ్  సలహాలు  ఇస్తున్న ధర్మవరపు సుబ్రమణ్యం యొక్క  రహస్యాలను చెప్పడం ద్వారా  అతని ద్వారానే  '' వీడికున్న  ఇన్ఫర్మేషన్ , కాన్ఫిడెన్స్  చూస్తే  వీడిని నమ్మొచ్చు'' అనిపిస్తాడు.  మహారాష్ట్ర బ్యాంకు లో  ఉన్న పట్టాల గురించి విలన్  కమీషనర్ నాజర్  ని చంపబోతున్న విషయాన్ని.  ఇంకా అనేక సందర్భాలలో   విషయం ఎప్పటికప్పుడు తెలుసుకునే ఏర్పాట్లతో సిధ్ధంగా ఉంటాడు.  తనకు తెలియని విషయాలను తెలుసుకునేందుకు ఏ మాత్రం సంకోచించడు.   లక్ష్యాన్ని   సాధించాలనుకునే ప్రతీవారు తెలుసుకోవలసినది ఇదే.  knowledge is power & knowledge gives you confidence.  ఎన్నికల్లో పోటీ చేస్తే ఒక్కో సెంటర్ లో ఎంత ఖర్చవుతుందో తెలుసా  అని ధర్మవరపు సుబ్రమణ్యం ఎగతాళి గా అడిగితే  అహ్మదాబాద్ నుండి మొన్న కడప వరకు ఎంత ఖర్చయిందో  ప్రస్తుతం ఎంత అవవచ్చునో  సమాచారం చెబుతుంటే అంతా నివ్వెరపోతారు మనతో సహా.    చేతిలో ఉన్న  సమాచారమే  ఆత్మ విశ్వాసాన్ని  పెంపొందిస్తుంది.   ఆఖరికి ప్రకాష్ రాజ్ ని ఎలక్షన్ నుండి అనర్హుడిని  చేసే సమాచారం  అతనికి అన్ని విధాల ఉపయోగపడుతుంది.   So always try  to acquire information by enhancing your knowledge.

4. FORM BUFFER CENTERS & DEVELOP A TEAM AND MAINTAIN WITH WIN/WIN
            
                   హీరో  మహేష్ బాబు ముంబాయికి వచ్చాక  తనకు కావలసిన సహాయం ఎప్పటికప్పుడు పొందేందుకు   ఒక buffer center  ( Buffer Platform)  గా  షియాజీ  షిండే ని ఏర్పాటు చేసుకుంటాడు.  అతనికున్న సమస్యని తొలగించడం ద్వారా అతని మద్దతు పొందుతాడు. ఎంతకావాలంటే నీకు డబ్బుకి  మర్డర్ లు చేసే వాడిలా  కనబడుతున్నానా  అని    అతనిని తన అవసరాలు తీరుస్తూ   తన లక్ష్యాన్ని సాధించేందుకు  లాంగ్ రన్ లో ఉపయోగించుకునేందుకు ఒక Resource గా  మార్చుకుంటాడు..  అంతే కాక  తన  అంతిమ లక్ష్యం  ప్రకాష్ రాజ్  కాబట్టి దానికి ఉపయోగపడే విధం గా ముంబాయిలో తన పట్టుకోసం  బలమైన టీం ఏర్పాటు చేసి  ఆ టీం సభ్యుల   అవసరాలు జీతాలిస్తూ  తీరుస్తాడు.    Team Building and Team performing are the important keys in the success of any individual or organization.   ప్రజలను ఉపయోగించుకోవడమే తప్ప  వారికి తగినంతగా ఉపయోగపడకపోవడమే  అనేకమంది నాయకులు అర్ధాంతం గా  కనుమరగవడానికి  కారణం.

5.. TAKE CALCULATED RISK - DEVELOP SAFEGUARD MECHANISM :

               తాను ఎంచుకున్న లక్ష్యం  అత్యంత ప్రమాదకరమైనది కాబట్టి ఎప్పటికప్పుడు  తన రిస్క్  కి సంబంధించిన   తగిన జాగ్రత్తలు తీసుకుంటాడు. ఆ  పరిణామం లోనే  హీరోయిన్ ని  ప్రేమలో  దించుతాడు  తన ప్రాణాలకు రిస్క్  పోలీస్ డిపార్ట్ మెంట్  కాబట్టి   కమీషనర్ కూతురైనకాజల్  ని  ఎంచుకుంటాడు.   కాని చివరికి ఆమె     ప్రేమలో  పడతాడు  అందుకు తగ్గ రిస్క్  తీసుకుంటాడు  అది వేరే సంగతి.   తన ప్రాణాలను రిస్క్ పెట్టినప్పుడల్లా  తగిన జాగ్రత్తల్లో ఉంటాడు.  'అందరం మనుషులమే   అందరికీ  ఫేమలీస్  ఉన్నాయి.  చదువుకున్న వాళ్ళే కదా  ఎమోషనల్  అవ్వద్దమ్మా '' .  అంటూ  తనని ఏమైనా  చేస్తే  ఏం జరగబోతుందో  చాలా స్పష్టం గా చెబుతాడు.   ఎమోషనల్  బ్లాక్ మెయిలింగ్  సరైనది కాకపోయినప్పటికీ   రిస్క్ ఉన్నప్పుడు   జాగ్రత్తలవసరమే.    Don't take chance at the risk of your life  అంటారు.   చివర్లో   కాజల్ కి తన ప్రేమ మీద నమ్మకం కలిగించడం కోసంవిలన్లను చంపడానికి  తనను తాను కాల్చుకుంటాడు.  రిస్క్ లేనిదే సక్సెస్ ఉండదు గదా...

6. HAVE COMMUNICATION AND NEGOTIATION SKILLS
      
                  మహేష్ బాబు  తన హీరోయిజం అంతా  మంచి కమ్యూనికేషన్ లో  చూపిస్తాడు.  ఇరవై వేలు రూపాయలను ఇరవై వేల డాలర్లనడం  మోసగించడం కానపుడు  తాను చేసినది మోసం కాదని కాజల్  ని  కన్విన్స్   చేస్తాడు.   దేవుడ్ని కొలవడం కూడా బిజినెస్  అని చెప్పడం,   లేడీని పులి వేటాడటం డిస్కవరీ చానల్ లో  చూసే వాళ్ళంతా లేడీ బ్రతకాలని కోరుకుంటారు, తీరా లేడీ బ్రతికాక టీ.వీ.లు కట్టేసి  హాయిగా నవ్వుకొని కోడి ని చంపి పలావ్ చేసుకొని తింటారు. వారికి లేడి మీద జాలి కన్నా, పులి ని ఏమీ చేయలేమన్న ఏడుపే ఎక్కువ అని చెప్పడం, చేపలను తినడం వయలెన్స్ కాదా అని చెప్పడం,     క్రైం చేసుకునే వాళ్ళకు వెధవ ఈగో లెందుకు  అనడంషియాజీ షిండే కు  దగ్గరవడం కాని ,  ఆఖరికి   డిల్లీని నీకే ఇస్తా  అని   తన plan of action  ని జాతీయస్థాయి నాయకుడి దగ్గర తెలియపరచడం  ఇవన్నీ   తన ప్రభావపూరిత  కమ్యూనికేషన్ కి పరాకాష్ఠ  అని చెప్పొచ్చు.  ఈ రోజుల్లో ఎంతమంది  అంత చక్కని కమ్యూనికేషన్ కలిగి ఉన్నారు. క్లాస్ లో  తన స్వంత క్లాస్ మేట్స్ వద్ద  సెమినార్  చెప్పాలంటే, ఇంటర్వ్యూ బోర్డ్ ముందు నిలబడాలంటే  ఆఖరికి  తన తల్లి దండ్రులతో తన ఇష్టాయిష్టాలు చెప్పాలంటే  బొమ్మరిల్లు సీన్  జరగాల్సిందే  కాని తమ అభిప్రాయాలను  సరిగా  చెప్పలేకపోతున్నారు.   A word  rules the world.   Napoleon Bonaparte ,   Adolf Hitler, Abraham Lincoln. Barack Obama ,  N.T.R    లు వీరంతా నాయకులు అవగలిగారంటే  వారి కమ్యూనికేషన్  మరియు  సంప్రదింపులు చెయ్యగలిగే నైపుణ్యమే.  ఈ సినిమాలో కథానాయకుడు  తన  సంభాషణా చాతుర్యం తో  పోలీస్ కమీషనర్ నిఆయన కూతుర్ని  , ఆఖరికీ  సినిమా చూడటానికొచ్చిన ప్రేక్షకుల హృదయాల్ని    కేజీలల్లో  కాదు  క్వింటాలలో కొట్టేస్తాడు.

7. HAVE RIGHT PHILOSOPHY OF LIFE
               
           ''  ఎవడి సినిమా వాడిదే.  ఎవడి సినిమాకి వాడే  హీరో.''  ఇదే  దర్శకుడు ఈ సినిమా ద్వారా  చెప్పాలనుకున్నది.  అనేకమంది మా వాడి సినిమా ఇన్ని రోజులాడింది, ఇంత కలెక్షన్స్ వసూలు చేసింది  అంటూ    వీధులకెక్కి  కాదు చివరికి టీ వీ  చానెల్లెక్కి  తన్నుకు చస్తున్నారు.  బహుశా  వారికి ఈ విషయం ఎవరు చెప్పిన  అర్థం  కాదని   మహేష్ బాబు చెప్పించాడు.  ప్రతి  ఫ్రేం లో   హీరో  తన జీవితం గురించి,   ఇతరుల అభిప్రాయాల గురించి స్పష్టం గా విశ్లేషిస్తాడు.   ఇక్కడ  ఎవరి ప్రపంచం  వారిదే.  నా ప్రపంచం నీకు అర్థం కాదు. అని హీరోయిన్ తో అంటాడు.  దేవుడి గురించిహింస గురించి ఆఖరికి  మాఫియా గురించి   తన ఆలోచనలు అందరినీ  ఆలోచింప చేస్తాయి.  సూర్య భాయ్  అంటే  ఒక పేరు కాదు  ఒక బ్రాండ్ ఇమేజ్.  ఇలా ప్రతి ఒక వ్యక్తి తను నమ్మిన సిద్ధాంతానికి లేదా సూత్రానికి ఒక ప్రతీకగా మారాలి.    అహింస అంటే  గాంధీజీసామాజిక సేవ అంటే  ఒక మదర్ థెరీసాసామాజిక న్యాయం అంటే  ఒక అంబేద్కర్.   ఇక్కడ జాతీయ నాయకులతో  ఒక సినిమా నాయకుడిని పోల్చడం కాదు నేను చెబుతున్నది.  నీ జీవిత సత్యానికి, నీ జీవన మార్గానికి నీవే ఒక పర్యాయపదం గా ఒక బ్రాండ్ ఇమేజ్  గా మారగలగాలి.
          ప్రతీ ఒక వ్యక్తి కూడా తన జీవితం గురించి, తన ఆలోచనల గురించితన జీవన విధానం గురించి నిర్ధిష్ట అభిప్రాయాలు కలిగియుండాలన్నదే  ఈ సినిమా చెప్పే  గొప్ప మేనేజ్ మెంట్  పాఠం 

8. SUCCESS DEPENDS UPON NET WORKING :
   
        నీవు ఉన్నతంగా  ఎదగాలంటే  ఎంతమంది తో సత్సంబంధాలు కలిగియున్నావన్నదే ముఖ్యం.  మొత్తం దేశం  అంతా తన నెట్ వర్క్  విస్తరింప చేయడం  తో జాతీయ రాజకీయాలను సైతం నిర్దేశించగల స్థాయికెలతాడు.   ప్రతీ రాజకీయ నాయకులు నిత్యం ప్రజలతో మమేకం  అవడానికి  ప్రయత్నించేది ఇందుకే...    పిసరంత  అధికారం చేతికొస్తే అహంకారం తలకెక్కి ప్రజలకు దూరమై  చివరికి  అడ్రస్ లేకుండా పోయిన నాయకులెంతోమంది  మన వ్యవస్థలో ఉన్నారు.  ప్రతీ చోట, ప్రతీ ప్రదేశం లో  తన వారిని  ఏర్పాటు చేసుకొని చాలా సంస్థలు బహుళ జాతి సంస్థలుగా ప్రపంచ నలుమూలలా వ్యాప్తి చెందుతున్నాయి.    నెట్ వర్క్ ఏర్పాటు చేసుకోవడం ద్వారా ఆక్టోపస్ లా  అష్టదిక్కులా  వ్యాప్తి చెందడమే  మనం నేర్చుకోవలసిన  గుణపాఠం. 

9. READY TO SACRIFICE  FOR YOUR DREAM :

        ప్రతి ఒక్కడికీ ఒక కల ఉంటుంది.  కలలు లేనివాడు మనిషే కాదు.  కాని ఈ  సినిమాలో  హీరో అడుగుతాడు నీ కలకోసం ఏమి  త్యాగం చేయగలవని.   ముంబాయిని  శాంతిగా ఉంచుదామనే కల కమీషనరైన నాజర్ కి ఉంటుంది  దానికోసం  ఏం చెయ్యగలరు. మీ కూతుర్నిచ్చి పెళ్ళి చెయ్యగలరాఅని ప్రశ్నిస్తే  వారికి కాదు    చూస్తున్న ప్రేక్షకులకి మాట రాదు..  కల కంటే  సరి కాదు.    కల సాకారం  పొందేందుకు ఎంతటి త్యాగానికైనా  సిద్ధపడాలి.   పిల్లల భవిష్యత్ గురించి కలలు కనే తల్లిదండ్రులు అహోరహం శ్రమించే తల్లిదండ్రులు, తాము కనుక్కోనవలసిన రహస్యాలకోసం  రేయనక పగలనక  ప్రయోగశాలల్లో గడిపే సైంటిస్ట్ లు    ఇలా ఎంత మందో  తమ కలల సాకారం కోసం శ్రమిస్తున్నారు. త్యాగాలకు సిద్ధంగా ఉంటున్నారు.   కాని  కలలు కంటూ  రోడ్డు మీద  వాల్ పోస్టర్ లకు  పాలాభిషేకాలురక్తాభిషేకాలు చేసే వారు  ఏం త్యాగాలు చేస్తున్నారో?...   చివరికి  కాజల్ ప్రేమను పొందడానికి  తన ప్రాణాలను త్యాగం చెయ్యడానికి సిద్ధపడతాడు.   కసి, శ్రమ, త్యాగం  జీవిత వ్యాపారాలు చేసే  ప్రతీ  కలల బేహారులకు  నిత్య పెట్టుబడులు. 

10. LIFE IS A MESSAGE.  :

                  '' జీవితం అనేది ఒక  యుద్ధం. దేవుడు మనల్ని వార్ జోన్ లో పడేసాడు.   Be alert   , protect  your self.   లైఫ్ లో ఒక గోల్ అంటూ పెట్టుకోండి .  కసితో పరిగెత్తండి.  పాడాలనుకుంటే కసిగా  పాడేయండి.  చదవాలనుకుంటే కసిగా  చదివేయండి. లైఫ్ లో ఏ గోల్ లేనివాళ్ళు మాత్రం  వీలైనంత త్వరగా చనిపోండి. మీవలన మాకు  ఏ ఉపయోగం లేదు. గుర్తు పెట్టుకో  నీ కంటే   ' తోపు '  ఎవ్వడూ  లేడిక్కడ. నీకు  ఏదనిపిస్తే  అది చెయ్యి.  ఎవ్వడి మాట వినొద్దు.  మనిషనే వాడి మాట అసలు వినొద్దు.  నీ టార్గెట్  టెన్ మైల్స్ అయితే  ఎయిమ్ ఫర్  ద లెవెన్త్  మైల్. . కొడితే దిమ్మ తిరిగిపోవాలి.  చల్. ''  ఇది  చివరిలో దర్శకుడు  మహష్  బాబు ద్వారా    అందించే సందేశం.   ఇదే   ఈ సినిమా నేర్పే జీవిత సత్యం. ఇవి  మహేష్ బాబు పాత్ర ద్వారా  దర్శకుడు పూరీ జగన్నాధ్  తన అనుభవాలనుండి నేర్చుకున్న జీవిత సత్యాలను  వ్యక్తిత్వ వికాస పాఠాలుగా  చెప్పించాడు.   దీని ద్వారా  తెలుసుకునేది  ఒకటే ఎన్ని ఆటంకాలైనా ఒంటరిగా ఎదుర్కొని  ఎదురీతలతో గమ్యాన్ని చేరావా  నీ జీవితం ఒక సందేశం  అవుతుంది. నీవు చెప్పే   ప్రతీ అక్షర సత్యం ఎంతో మందికి మార్గదర్శకం అవుతుంది.నీవు  నడిచిన దారి  పదిమందికి గమ్యం చేర్చే రహదారి  కావాలి. . నీ వద్దకు టీవీ చానెళ్ళు కెమెరా పట్టుకొని వస్తే  నీ  డైలాగ్స్ నీవు చెప్పగలగాలి.   No one kicks a dead dog.     Be a hero.  live like a hero  and  die  like  a hero.


 ఇవి ఈ సినిమాలో గమనించదగిన మేనేజ్ మెంట్ సూత్రాలు.  ఈ సినిమా  ఫక్తు మసాలా సినిమా ,  మాఫియా ని గొప్పగా చూపిన సినిమా ..అంటూ అనేక మంది ప్రముకులు అనే భావించే వారు నాతో ఈ బ్లాగ్ చదివాక విమర్శించినవారు లేకపోలేదు. నేను చెప్పేది ఒకటే .. ఒక విషయాన్ని మనం ఎలా గ్రహిస్తామన్నదే. మంచి చెడు అనేది మనం గ్రహించే విధానంలో ఉంటుందని షేక్ స్పియర్ అంటాడు. హంస  పాలు స్వీకరించి నీరు విదిచిపెడుతుందట... మనకు ఆనందం కలిగించేది పాలు అనుకోండి ..విషాదం, బాధ కలిగించేది నీరు అనుకోండి. ఆనందం కలిగించేది స్వీకరించి  బాధను కలిగించే అంద్శాలు విడిచిపెట్టండి.  సినిమాలలోనే కాదు. నిజ జీవితంలో కూడా....   అప్పుడే ఆనందం మీ వెంట, ఇంట, చెంత ఉండగలదు....


 విష్ యు ఆల్ ది బెస్ట్ .....
      అలజంగి ఉదయ కుమార్ ....
trainerudaykumar@gmail.com